第一次見到呢間攝影公司嘅作品係喺我好朋友嘅婚禮上，雖然我同我太太已經喺香港影過一輯Pre-Wedding，但係我同我太太都俾佢哋嘅作品深深吸引住，風格自然得來又好華麗，於是即刻問我好朋友攞佢哋嘅聯絡資料。

之後一直都係WhatsApp同呢間公司聯絡，佢哋都好詳細解釋攝影內容、package、價錢等資料，好細心同好有耐心，又會俾好多建議我哋，好快我哋都落訂預約去濟州影相。

去到拍攝當日，翻譯員一早已經係酒店lobby等我哋，準備車我哋去化妝同試衫，翻譯姐姐非常健談，喺車上不斷叫我哋放鬆啲，叫我哋最緊要影得開心，有咩問題即刻同佢反映，唔需要覺得唔好意思。之後化妝師技術一流，會先問我哋想要既妝同髮型，盡量配合我哋，試衫時間亦非常充足。

化完妝揀好衫食飽飯後，出發到第一個景點，攝影師非常友善，拍攝途中不斷示範不同動作，務求影到理想嘅效果，當完成每一個景點後，攝影師都會俾我哋過目所有相片，又會問我哋有冇其他想要影嘅姿勢或效果，感覺非常舒服。

影到攰攰地，搭車途中翻譯姐姐又突然拎出親手準備嘅食物俾我哋充飢，司機姐姐又拎出佢準備嘅生果俾我哋食，又無啦啦佢買嘢飲俾我哋飲，成個過程好窩心同開心。

到最後一個景點完成拍攝後，翻譯姐姐仲俾咗佢親手整嘅嘅禮物我哋作為結婚禮物，有少少感動。成個拍攝團隊包括攝影師化妝師司機翻譯員都非常好人服務一流。利申，唔係賣廣告，如果第一次影Pre Wedding，真心建議搵呢間公司包你唔會後悔。