以前去過濟州旅行一次就鍾意呢個地方，所以Pre-Wedding就毫不猶豫揀咗去濟州影相。上網搵韓國攝影搵到呢間Prewedding公司，呢間agent公司直接包辦同韓國嗰邊嘅攝影師、化妝師、婚紗聯絡，亦都有提供翻譯，唔使擔心語言嘅問題，直接帶個人過去就得。出發前同香港呢邊嘅Karissa員工預約定影嘅場景，佢哋對於唔同季節都有推介嘅景點。既然係春季咁我哋我哋決定咗影櫻花、海蘿蔔花、油菜花和沙灘。

出發前一兩日會有翻譯同我哋聯絡，同我哋約時間喺酒店等。當日影相十分之好天，有翻譯同司機車我哋去化妝室，路上已經同翻譯傾緊會鍾意啲咩類型嘅婚紗。去到化妝室好快地安排女仔去化妝，而男仔就去咗試西裝。同時間翻譯好快同化妝室嗰邊溝通，揀咗六條唔同種類嘅婚紗俾女仔試。一切搞掂之後，就可以去附近食個輕便嘅lunch。lunch之後就可以返去化妝室嗰邊換衫準備出發。

所有影相嘅地點都完全唔使擔心，佢哋都會有秘密嘅影相地點，唔會遇上好多人，可以放心喺度影相。全程都比較輕鬆，攝影師好專業，會係咁教我哋擺唔同嘅姿勢。助手姐姐都好幫手係咁幫我哋調整個髮型同個妝。翻譯嘅姐姐都好努力咁喺度翻譯攝影師嘅對話俾我哋聽，令到我哋可以更加快咁完成拍攝。本身我哋冇打算影馬路，見中途有少少時間，所以詢問咗攝影師之後佢好爽快咁應承咗我哋。真係好多謝佢哋俾我哋影多一個場景。所以就算去咗三四個地方影相，完全唔覺得攰，覺得喺邊玩邊影相。

最後一個場景係去沙灘拍攝，由於係三月尾，傍晚時分都比較凍，又比較大風。助手姐姐超級好人，一見唔係拍攝嘅時候，就即刻幫女仔披返件衫，又係咁幫手整理髮型。最後好順利咁完成晒所有嘅拍攝，翻譯姐姐仲窩心地送咗濟州島嘅手信俾我哋。最後司機姐姐車我哋返酒店。總括而言係一個好難忘嘅Pre Wedding，會推介身邊嘅朋友搵佢地。